দুপৰীয়া ভাতকেইটা খাই গাৰুটো লৈ ৰিমে বিচনাত বাগৰ দিছে মাত্ৰ ফোনটো বাজি উঠিল …" Raag calling". তাই ধৰিলে " ক’ কি হ’ল ৷"…" আজি চাৰিটাত পোৱাকে আহিবি হা ৷" তাই অলপ আচৰিত হৈ সুধিলে " ক’ত যাব লাগে ? বিজয়াদশমী চোন ৷"…" মূৰ্খ কালি কি কৈছিলো মনত নাই ? চান্দমাৰি ব্ৰিজ ৷"…"নাযাওঁ নেকি এলাহ লাগিছে ৷"…" নচলিব এইবোৰ ৷ আমিকেইটা পৰহি যামেই ৷ তাৰ পিছত আৰু ছমাহ ৷ বাহ ! যোৱাৰ আগত এবাৰো লগ নকৰ। এই প্ৰেম, এই দোস্তি !" অলপ emotional blackmail কৰিলেই ৰিম মান্তি হ’ব বুলি সি ভালকৈ᪅জানে ৷
ৰাস্তাত বাছ কম ৷ দোকানবোৰো প্ৰায় বন্ধ ৷ পূজা মণ্ডপবোৰ কইনা উলিয়াই দিয়া ৰভাতলীৰ দৰে নিস্তেজ ৷ মানুহ-দুনুহ নাই ৷ তাইৰ মনটো কিবা গধুৰ লাগি গ’ল ৷ তাই আৰু ৰাগ গৈ পায় মানে দীপ আৰু আকাশ ইতিমধ্যেই বহিয়ে আছিল ৷ দীপে চিগাৰেট এটা টানি কিবা ভাবি আছে ৷ ইফালে আকাশ coc ত attack দিয়াত ব্যস্ত ৷ তাইৰ মানে এইটো দেখিলেই ম’বাইল দলিয়াই দিবলৈ মন যায় ৷ গোটেই কেইটা বহিল ৷ এখনৰ পিছত এখন ট্ৰাক মূৰ্তি লৈ গৈছে ৷ চাৰিওফালে ঢাক ঢোলৰ শব্দ ৷ দীপে তেতিয়াও চিগাৰেটটো এৰা নাছিল ৷ " চৰ মৰাৰ আগত সেইটো পেলা ৷" ৰিমৰ খং উঠিল ৷
…কেইটামান মাহৰ আগৰ কথা ৷ এদিন এই চান্দমাৰি ব্ৰিজত বহিয়েই তাই এখন 'উপন্যাস' পঢ়িছিল ৷ জীৱন্ত উপন্যাস ৷ বুজা নুবুজাৰ মাজত ৷ ডিচেম্বৰৰ সন্ধিয়াবোৰ বৰ সোনকালে নামে ৷ হেঙুলীয়াবোৰো কুঁৱলীয়ে ঢাকে ৷ শীতৰ সন্ধ্যাবোৰো ৰহস্যময়ী ৷ কেতিয়াবা যদি সপোন সৰে কেতিয়াবা আকৌ বিষাদ নামে ৷ ৰিম আৰু দীপ ব্ৰিজত বহিছে ৷ তাই আহিছে কিছুমান প্ৰশ্নৰ উত্তৰ বিচাৰি ৷ পশ্চিম আকাশত ভাগৰুৱা বেলিটো হেৰাই গ’ল ৷ তলৰ বাটটোত চকুৰে মণিব পৰালৈকে মাথো গাড়ীৰ পোহৰ, streetlight …কুঁৱলীয়ে অস্পষ্ট কৰি তুলিছে ৷ দীপে পকেটৰপৰা চিগাৰেট এটা উলিয়াই জলাই ল’লে ৷ "তই চিগাৰেট কিয় এৰিব নোৱাৰ ? কৈ কৈ ভাগৰি গৈছো৷ " সি একো নামাতিলে ৷ মাথো মুখৰ পৰা ধোঁৱাবোৰ উলিয়াই দিলে ৷ ধোঁৱাবোৰ কুন্দলী পকাই কুঁৱলীৰ লগত মিলি গ’ল ৷ " কি শান্তি বিচাৰি পাৱ’ চিগাৰেটডালত ?" সি তেতিয়াও নিমাত ৷ ৰিমৰ অসহ্য লাগিল ৷ সি নিস্তব্ধতা ভাঙিলে " মানুহক কিমান তললৈ নমা দেখিছ ? …মই দেখিছো ৷" শেষ হৈ অহা চিগাৰেটটোলৈ এবাৰ চাই মাটিত পেলাই লাহেকৈ ভৰিৰে মোহাৰি পেলালে ৷ " ঘৰৰ মানুহবোৰৰ আগত যেতিয়া নিজৰে দোষী দোষী অনুভৱ হয়, চকুত চকু থৈ কথা কোৱা সাহস নাথাকে, এনে লাগে নিজকে শেষ কৰি পেলাম ৷ " সি এবাৰ হাঁহিলে ৷ " কিন্তু guts বুজিছনে, guts . ইমান guts নাই ৷"
( to be continued )
No comments:
Post a Comment